تابي وتمارا في نقاط البيع في أودو: الدفع بالتقسيط

نُشر في 13 سبتمبر 2026آخر تحديث 1 أكتوبر 2026مدة القراءة 9 دقائق

شرح عملي لطريقة قبول الدفع بالتقسيط عبر تابي وتمارا في نقاط البيع في أودو: رمز QR على جوال العميل، بدون جهاز إضافي، وزر التأكيد يظل مقفلاً حتى يتم التحصيل.

في فروع التجزئة بالسعودية والخليج صار سؤال «فيه تقسيط؟» جزء ثابت من عملية البيع عند الكاشير. العميل يمسك المنتج، يوصل الكاونتر، ويسأل إذا يقدر يقسّم. إذا كان الجواب لا، جزء من السلة يرجع للرف.

أغلب اللي مكتوب عن تابي وتمارا يفترض أن العميل يشتري من المتجر الإلكتروني. لكن الواقع داخل الفرع مختلف تماماً، وأودو ما فيه دعم أصلي للدفع بالتقسيط في نقاط البيع، فلازم يضاف. الخبر الجيد أن العملية داخل الفرع أبسط مما يتوقع الكثير، وما تحتاج أي جهاز جديد.

هذا المقال يشرح العملية من أولها لآخرها: كيف تمشي عند الكاشير، كيف تجهزها، وش تعلّم الموظف، ووش النقطة الوحيدة اللي تحدد إذا تقدر تثق فيها مع بضاعة حقيقية.

ليش نقاط البيع أصعب من المتجر الإلكتروني

في المتجر الإلكتروني عندك مساحة أمان. الطلب ما يُشحن إلا بعد ما تشوف حالة مدفوع، وفريق الشحن يقدر يوقف أي طلب مشكوك فيه.

عند الكاونتر ما فيه مساحة أمان. العميل واقف قدامك ماسك المنتج، والبضاعة تطلع من الفرع خلال ثوانٍ. ما فيه مراجعة لاحقة تنقذك.

فالسؤال التصميمي الوحيد المهم في ربط تابي وتمارا مع أودو داخل الفرع هو: وش اللي يمنع الكاشير من إقفال طلب ما وافقت عليه المنصة فعلياً؟ كل شيء ثاني تفصيل.

كيف تمشي العملية فعلياً عند الكاشير

الفكرة الأساسية أن الجهاز اللي يقرأ الدفعة هو جوال العميل نفسه، مو ماكينة عندك.

الخطوات بالترتيب

1. الكاشير يسجل السلة عادي في شاشة نقطة البيع.
2. عند الدفع يختار تابي أو تمارا كطريقة دفع بدل النقد أو الشبكة.
3. تفتح نافذة فيها رمز QR خاص بهذي العملية بالذات، وفيه المبلغ مربوط فيها.
4. العميل يصور الرمز بكاميرا جواله، فتفتح له صفحة المنصة أو تطبيقها، يشوف خطة الأقساط، يسجل دخوله، ويوافق.
5. الموافقة تصير على طرف المنصة، لا على شاشتك. نقطة البيع تسأل المنصة بشكل متكرر عن حالة العملية.
6. أول ما تصير العملية مصرح بها، السيرفر يطلب التحصيل تلقائياً.
7. بعد نجاح التحصيل فقط، يفتح زر التأكيد للكاشير.

هذي النقطة مهمة: الرمز يتولد لكل عملية على حدة لأنه مرتبط بمبلغ السلة. يعني ما تقدر تطبع ملصق QR ثابت وتحطه على الكاونتر. أي حل يعتمد على رمز ثابت مو حل دفع، هو مجرد رابط تسويقي.

نفس المنطق ينطبق على الحلول اللي ترسل رابط دفع على إيميل العميل داخل الفرع. تقنياً تشتغل، لكنها تخلي الكاشير ينتظر العميل يفتح بريده وهو واقف بالطابور، وغالباً الإيميل ما يوصل بسرعة. المسح المباشر أسرع وأوضح.

ليه ما تحتاج جهاز أو ماكينة إضافية

السبب بسيط: جوال العميل هو القارئ. أنت تعرض رمز على الشاشة، وهو يصوره.

هذا يعني عملياً:

• ما فيه شراء أجهزة ولا انتظار توريد، ولا سيم كارت ولا بطاريات ولا صيانة.
• ما فيه تسوية يومية على جهاز منفصل. كل شيء داخل أودو.
• يشتغل على أي جهاز يفتح شاشة نقطة البيع: كمبيوتر، لابتوب، أو تابلت.
• ما يحتاج IoT Box، لأنه ما فيه شيء موصول فيزيائياً.
• تقدر تفعّله في فرع جديد في نفس اليوم، وتشيله بنفس السهولة.

الشي الوحيد اللي يحتاجه العميل هو إنترنت على جواله. هذي أكثر نقطة احتكاك في الواقع، وحلها بسيط: وفّر شبكة واي فاي للزوار عند الكاونتر.

النقطة الأهم للمالك: زر التأكيد يظل مقفل

لو ما تذكر من هذا المقال إلا سطر واحد، خله هذا.

صور السيناريو: الطابور طويل، والعميل يرفع جواله ويقول «تمت». الكاشير تحت ضغط، يضغط تأكيد، والعميل يطلع بالبضاعة. بعدين يطلع أن العملية ما اكتملت، أو أن اللي شافه الكاشير كان سكرين شوت من عملية قديمة.

الحل مو تدريب ولا تنبيه ولا لصق ورقة على الشاشة. الحل أن النظام نفسه ما يسمح بالخطأ. في ربط تابي وتمارا مع نقاط البيع في أودو يظل زر التأكيد مقفل إلى أن يرجع السيرفر بتأكيد التحصيل من المنصة. ما فيه تجاوز يدوي، وما فيه اعتماد على كلام العميل أو على صورة شاشة.

وهذي نفس الفلسفة المطبقة على المتجر الإلكتروني: رابط الرجوع ما يحمل إلا رقم مرجعي، والحالة الحقيقية تُقرأ من واجهة المنصة نفسها عبر GET /api/v2/payments/{id}. يعني صفحة نجاح مزورة ما تقدر تخلي الطلب مدفوع. والعمليات اللي وصلت لحالة نهائية ما تُعاد معالجتها مرة ثانية. وجانب المتجر الإلكتروني من هذا المنطق، وشكل رابط الرجوع المزوّر، وكيف تختبر أي إضافة ضده، كله في ليش رابط النجاح المزوّر ما يقدر يخلي الطلب مدفوع.

يشتغل على نقاط البيع القديمة والجديدة

أودو أعاد بناء واجهة نقاط البيع بالكامل. الإصدارات من 14 إلى 16 تستخدم الواجهة القديمة، ومن 17 إلى 19 تستخدم الواجهة الجديدة، وطريقة تسجيل وسيلة الدفع تختلف بينهما بشكل جوهري.

الإضافة تغطي الاثنين، من 14.0 إلى 19.0، على النسخة المجتمعية والمؤسسية. لو عندك فروع على إصدارات مختلفة، سلوك الكاشير يبقى نفسه في كل فرع، وهذا يختصر التدريب.

ملاحظة صريحة حتى ما يصير سوء فهم: أودو يبيع كل إصدار كمنتج منفصل من 13.0 وطالع، فالترقية لإصدار جديد تعني شراء نسخة الإصدار الجديد. المذكور أعلاه هو المغطى اليوم.

الإعداد خطوة بخطوة

أولاً: حساب التاجر

قبل أي كلام تقني، لازم يكون عندك حساب تاجر لدى تابي عبر merchant.tabby.ai، وحساب لدى تمارا. غالباً يطلبون سجل تجاري أو وثيقة عمل حر، وحساب بنكي باسم النشاط.

الإضافة ما تفتح لك الحساب ولا تسرّع الموافقة. دورها يبدأ بعد ما تستلم المفاتيح، وجانب المتجر الإلكتروني من الشغل، من حساب التاجر إلى أول طلب حقيقي، مشروح في دليل ربط تابي مع أودو خطوة بخطوة.

ثانياً: مفاتيح الكاشير من الإعدادات

نقطة البيع ما تستخدم المفاتيح اللي حطيتها في مزودي الدفع حق الموقع. لها مفاتيحها الخاصة في الإعدادات، تحت قسم Tabby BNPL: مفتاح تابي السري والعام ورمز التاجر، ورمز تمارا للواجهة البرمجية، وخيار Tamara Sandbox للبيئة التجريبية. ابدأ بمفاتيح تابي التجريبية وخيار Tamara Sandbox مفعّل، بعدين اضغط Test Tabby connection قبل أي شيء ثاني. المفتاح المنسوخ من البيئة الغلط، أو من منطقة تابي الغلط، ينكشف هنا في ثانيتين بدل ما تكتشفه قدام عميل. تمارا ما لها زر مثله في هذي الشاشة، فأول عملية تجريبية صغيرة عند الكاشير هي اختبارها. ومن وين تجيب رمز تمارا، وكيف تتأكد منه بزر اختبار الاتصال في مزود تمارا حق الموقع، وليش خيار البيئة التجريبية لازم يتغير مع حالة المزود يوم الإطلاق، كلها في دليل ربط تمارا مع أودو خطوة بخطوة.

ونفس القسم يحدد كم ينتظر الكاشير موافقة العميل: 300 ثانية افتراضياً، وتابي يطلب ما تقل عن 180. ولو عند أحد فروعك رمز تاجر خاص من تابي، حطه في إعداد نقطة البيع حق هذاك الفرع.

ثالثاً: تفعيل طريقة الدفع في نقطة البيع

من نقطة البيع، ثم الإعدادات، ثم طرق الدفع. الإضافة تحاول تنشئ طريقة لتابي وطريقة لتمارا وقت التثبيت، ولو ما لقيتها أنشئها بنفسك وفعّل في كل طريقة خانة Enable Tabby أو Enable Tamara. وغالباً تكون ناقصة لسببين: القاعدة ما كان فيها دفتر بنكي وقت التثبيت، أو إنك شغال على شركة غير اللي تثبتت منها الإضافة، والإنشاء التلقائي ما يغطيها. ليش ما تنشأ طرق الدفع تلقائياً وقت التثبيت يوريك السطر اللي يؤكد السبب في سجل السيرفر. بعدها اربطها بإعداد نقطة البيع الخاص بالفرع. بعدين أغلق الجلسة المفتوحة وافتح جلسة جديدة، لأن إعدادات الجلسة تُحمّل عند بدايتها.

تقدر تفعّل تابي في فرع وتمارا في فرع ثاني، حسب اتفاقك مع كل منصة.

رابعاً: العملة

الإضافة تعمل بعملات محددة: الريال السعودي، الدرهم الإماراتي، الدينار الكويتي، الدينار البحريني، الريال القطري، والريال العماني، وحسابك عند تابي أو تمارا ممكن يغطي أقل منها. في الموقع، الإضافة تخفي المزود لو كانت عملة الطلب خارج هذي القائمة. أما نقطة البيع فما فيها هذا الفلتر: طريقة تابي أو تمارا تظهر مهما كانت عملة نقطة البيع، والدفعة تنرسل بنفس العملة، فلو كانت خارج القائمة بتظهر الطريقة وتفشل وقت ما يستخدمها الكاشير. تأكد من عملة نقطة البيع قبل أول بيعة.

وفي الموقع، العملة هي أول شيء تتحقق منه لو تابي ما يظهر في صفحة الدفع أصلاً. وقوائم الأسعار وزر النشر يزيدون طرق اختفاء المزود هناك، ودليل حل مشكلة تابي ما يظهر في صفحة الدفع يمشي عليها بالترتيب. وأي عملة يقبلها حسابك فعلاً، وكيف تبيع بأكثر من عملة، تلقاه في دليل العملات الخليجية مع تابي وتمارا.

خامساً: تدريب الكاشير

التدريب كله موقفين، ودقيقتين تكفي:

الأول: المنصة رفضت الطلب. هذا قرار ائتماني من تابي أو تمارا، ومو خطأ في نظامك. الجملة المناسبة: «المنصة ما اعتمدت العملية، تحب نكمل بطريقة ثانية؟» بدون تفسير ولا اجتهاد.

الثاني: جوال العميل ما عنده إنترنت. الحل: وفّر الواي فاي، أو اعرض طريقة دفع بديلة.

لو صار خلل، وين تدور

كل دفعة من الفرع لها سجل خاص تحت نقطة البيع، ثم الطلبات، ثم Tabby Payments، وفيها دفعات تمارا كذلك: حالتها ومبلغها ورسالة الخطأ من المنصة لو فشل نداء. يعني لما يقول لك الفرع إن عملية علّقت، تفتح سجلها وتشوف وش ردّت المنصة، بدل ما ترفع تذكرة وتنتظر. أما نداءات الموقع فلها سجل منفصل، سجل طلبات الواجهة البرمجية، مع إخفاء المفاتيح والأسرار.

والقاعدة الذهبية: لا تعلّم الطلب كمدفوع يدوياً عشان تفك الطابور. إذا ما تحصّل المبلغ، ما وصلك شيء، وأنت بتسلم بضاعة مقابل لا شيء.

الاسترجاع

بيعة الفرع تنرجع مثل أي بيعة في نقطة البيع: الكاشير يفتح الإيصال الأصلي، يضغط استرجاع، ويختار الأصناف اللي رجعت. ولو كانت الدفعة تابي، الإضافة ترسل هذا المبلغ لتابي أول ما يتزامن طلب الاسترجاع. والجزئي مهم في التجزئة، لأن العميل غالباً يرجع صنف واحد من سلة، وهنا الأصناف هي اللي تحدد المبلغ. ومن الخلفية، زر Refund on Tabby في الفاتورة أو في سجل الدفعة يسترد كل المتبقي، ويظهر لمن عنده صلاحية Tabby Refund. وهذا الزر حالياً هو طريق بيعة تمارا من الفرع كذلك، فالإرجاع الجزئي لتمارا ترتّبه معها مباشرة. المسارات الثلاثة بالتفصيل، ووش يصير لما يتزامن استرجاع الكاشير مع المنصة، في دليل استرجاع تابي وتمارا في أودو.

نقطة لازم تكون واضحة: عدد الأقساط ورسوم المنصة على التاجر تحددها تابي وتمارا في اتفاقك معهم، لا هذي الإضافة. الإضافة تنفذ الاسترجاع وتوثقه، وتفاصيل الخصم تمشي حسب عقدك مع المزود.

وش ما يسويه هذا الحل

من باب الوضوح:

• ما يفتح لك حساب تاجر، ولا يضمن الموافقة.
• ما هو منتج رسمي من تابي أو تمارا، ولا فيه أي شراكة أو اعتماد منهم. هو ربط مستقل من Kerneltics مبني على الواجهات البرمجية المعلنة.
• ما يحدد نسب الرسوم ولا خطط الأقساط. هذي بينك وبين المزود.

المصدر مفتوح بترخيص LGPL-3 ومكتوب بتعليقات واضحة، فأي شريك أودو يقدر يقرأه ويصيانه بنفسه.

قائمة تحقق قبل التشغيل في الفرع

• حساب التاجر معتمد ومفاتيح الإنتاج جاهزة.
• زر Test Tabby connection في الإعدادات، قسم Tabby BNPL، رجع نجاح بالمفاتيح الحقيقية، وخيار Tamara Sandbox مطفي.
• عملة نقطة البيع ضمن العملات المدعومة.
• طريقة الدفع مربوطة بإعداد نقطة البيع الصحيح، والجلسة أُعيد فتحها.
• عملية تجريبية بمبلغ بسيط من البداية للنهاية، ثم استرجاعها.
• الكاشير جرب سيناريو الرفض مرة واحدة على الأقل.
• شبكة الواي فاي للزوار تعمل عند الكاونتر.

إذا خلصت هذي القائمة، تقدر تشغل تابي وتمارا داخل الفرع بنفس الثقة اللي تتعامل فيها مع الشبكة، لأن البضاعة ما تطلع إلا بعد ما يتأكد التحصيل فعلياً. وإذا حاب تغطي المتجر الإلكتروني وبوابة العميل ونقاط البيع بتثبيت واحد بدل إضافات متفرقة، الوحدة اللي تجمع تابي وتمارا في أودو مبنية لهذا الغرض بالذات.

أسئلة متكررة